Kilusan.Net

“Pumanig ka sa mga piloto at empleyado ng PAL na naka-SOS, hindi kay Lucio Tan.”

Ito ang panawagan ng sentrong unyong Kilusang Mayo Uno kay Presidente Benigno Simeon “Noynoy” Aquino III matapos “pagalitan” ng pangulo ang mga piloto ng Philippine Airlines na tumangging pumasok sa trabaho noong Sabado at ang PAL Management para sa “mga kaguluhan” sa operasyon ng kumpanya.
Ipinahiwatig din ni Presidente Aquino ang pagsasampa ng kaso laban sa mga piloto at sa PAL Management. Kasunod ito ng return-to-work order ng PAL Management sa mga piloto nito at sa pag-anunsyo nitong kakasuhan ang huli.

“Dapat itulak ni Presidente Noynoy ang PAL Management na tugunan ang mga ugat ng problema na nasa sigalot sa paggawa sa kumpanya. Hindi siya dapat magpatali sa umano’y kaguluhang idinulot sa turismo at ekonomiya ng nangyari. Kabuhayan ng mga empleyado ng PAL ang nakataya rito,” sabi ni Elmer “Bong” Labog, chairperson ng KMU.

Dapat tigilan din ni Presidente Noynoy ang mga satsat tungkol sa pagsasampa ng kaso. Para siyang sumusunod sa PAL Management niyan. Alam nating ang mga piloto, hindi ang PAL Management, ang talagang tatamaan kapag gumawa ng hakbanging ligal ang gobyerno,” dagdag niya.

Dalawahang trabaho

Ayon sa mga ulat, ang mga piloto ay pinwersang magtrabaho sa Air Philippines, na katulad ng PAL ay pag-aari ng business tycoon na si Lucio Tan, sa mas mababang sahod at nang kontraktwal ang katayuan.

“Sino namang magugustuhan ang magtrabaho sa kumpanyang ang trato sa iyo ay pag-aari? Na pinupwersa kang gawin ang mga bagay na labag sa kalooban mo, dahil ang tingin nito’y malaki ang pagkakautang mo? Nauunawaan namin ang mga piloto; nakikisimpatya kami sa kalagayan nila. Ang nangyaring kaguluhan sa PAL ay direktang resulta ng mga hakbangin ng PAL Management,” ani Labog.

Ayon sa KMU, isang “SOS” ang hakbanging ginawa ng mga piloto para makialam ang gobyerno hindi lang pabor sa mga piloto, kundi sa iba pang empleyado ng PAL. Noong Hunyo, sinabi ng Department of Labor and Employment, kaugnay ng mga usapin sa paggawa sa PAL, na isang management prerogative ang pagsasagawa ng outsourcing at spin-off. Hinudyatan nito samakatwid ang mga iskemang nagbabantang magtanggal sa trabaho sa 3,000 empleyado.

“Dapat makisangkot si Presidente Noynoy hindi lang para sa mga piloto kundi sa iba pang empleyado ng PAL. Ipinapakita ng kalagayan ng mga piloto ang sitwasyon ng iba pang empleyado ng PAL. Dahil sa plano ng manedsment na magpatupad ng outsourcing at spin-off ng mga operasyon, nangangamba sila para sa kanilang trabaho. Gusto silang palitan ng PAL Management ng mga kontraktwal at kaswal na mababa ang sahod at walang seguridad sa trabaho,” ani Labog.

www.kilusangmayouno.org